Narendrabhooshan – Personal

The personal information of Narendrabhooshan and his family are published here.

വേദധര്‍മത്തിലേക്കുള്ള ഉപനയനം

കെ. ജയകുമാര്‍ (മലയാള സര്‍വകലാശാലാ ഉപകപലപതി)

വ്യക്തിസത്ത ആശയത്തില്‍ ആരൂഢിക്കുമ്പോഴേ ഒരു വ്യക്തി പ്രതീകമായിത്തീരുന്നുള്ളൂ. ജീവിതകാലത്ത് നല്ലതു് ചെയ്തവരെല്ലാം പ്രതീകങ്ങളായി മാറാറില്ല. സല്‍ക്കര്‍മാനുഷ്ഠാനത്തിനപ്പുറം മറ്റൊരു തപസ്സുകൂടി അനിവാര്യമാണതിന്. ഈ തപശ്ചര്യകൊണ്ടു് സ്വജീവിതത്തെ വൈദിക സംസ്കാരത്തിന്റെയും ജ്ഞാനതൃഷ്ണയുടെയും ഉജ്ജ്വല പ്രതീകമാക്കി മാറ്റിയ മനീഷിയാണു് മണ്‍മറഞ്ഞ നരേന്ദ്രഭൂഷണ്‍.

അദ്ദേഹത്തെ ആദരിക്കുന്ന ഒരു ചടങ്ങില്‍ പങ്കെടുക്കാന്‍ കഴിഞ്ഞതോടെയാണു് ഞാന്‍ അദ്ദേഹത്തെക്കുറിച്ചു് കൂടുതല്‍ അറിയാനും, അന്വേഷിക്കാനും തുടങ്ങിയതു്. നേരിട്ടു് കണ്ടപ്പോഴാകട്ടെ, അസാധാരണമായ ഒരു മൗനംകൊണ്ടു് അദ്ദേഹം വ്യത്യസ്തനായി അനുഭവപ്പെട്ടു. അതിവിനയമില്ല, എന്നാല്‍ അറിവിന്റെ അഹന്തയില്ല. അസഹിഷ്ണതയില്ല. എന്നാല്‍ വിട്ടുവീഴ്ചയ്ക്കൊരുക്കമല്ല. പിടിവാശിയാകാത്ത ഒരു നിഷ്ഠ അദ്ദേഹത്തിന്റെ വ്യക്തിത്വത്തെ ചൂഴ്നു നിന്നിരുന്നു. വേദവിജ്ഞാനത്തിന്റെ സമകാലികവും സാര്‍വകാലികവുമായ സാംഗത്യത്തെ ലോകത്തിനു് പരിചയപ്പെടുത്തിക്കൊടുക്കുക മാത്രമല്ല ആചാര്യ നരേന്ദ്രഭൂഷണ്‍ ചെയ്തതു്. ആ അറിവിന്റെ അക്ഷയപ്രകാശം ലോകത്തിനു് നഷ്ടമാകരുതന്നെ നിര്‍ബന്ധം കൂടിയുണ്ടായിരുന്നു ആ ജ്ഞാനയജ്ഞത്തിനു് പിന്നില്‍.